Vinnugleði í Þórsmörk

18/04/2017

Páskahelgin var nýtt til fullnustu í Þórsmörk þar sem hópur vaskra sjálfboðaliða gerði sér lítið fyrir og reif gamla pallinn við skálann og smíðaði nýjan!

17903462_10212888462033081_478830874277984167_n.jpg 17903898_10212888461353064_4583333271318009465_n.jpg

Efnt var til vinnuferðar inn í Langadal yfir páskahelgina þar sem þátttakendum bauðst að dvelja á þessum dásamlega stað gegn því að aðstoða við pallasmíði. Yfir tíu manns mættu á svæðið og tóku til hendinni af miklum myndarskap undir verkstjórn Halldórs Hafdals Halldórssonar.

Veðrið lék við mannskapinn með einmuna blíðu og áður en helgin var á enda runnin var búið að rífa fúnu pallana við skálann og salernishúsið og smíða nýja palla í stað þeirra gömlu.

17951582_10212911366205671_8596965656870471322_n.jpg 17992104_10212911372325824_2669667781314832016_n.jpg

Að auki gaf hópurinn sér tíma til að njóta samverunnar og náttúrunnar, ganga um svæðið og upp á Valahnúk, borða saman dýrindis páskalamb og síðast en ekki síst dást að einhverjum fallegasta bálkesti sem sögur fara af í Langadal, hlöðnum úr gamla pallaefninu :)

valahnuk.jpg balkostureftir.jpg