Fjölskylduganga 5 maí - Mosfellsbær - rætur Grímannsfells og Helgufoss
Ferðafélag Íslands og Mosfellsbær - heilsueflandi samfélag, standa fyrir gönguferðum næstu þriðjudaga, þegar farið er í léttar fjallgöngur á fellin í Mosfellsbæ.
Helgufoss – rætur Grímannsfells
Þriðjudagur 5 maí kl. 17.30
Mæting við Glúfrastein – gengið frá Glúfrasteini og upp með Köldukvísl að Helgufossi og að rótum Grímannsfells, að nýlegri göngubrú ofan við Helgufoss. Þar verður snúið við og gengið sömu leið til baka. Gert er ráð fyrir að gangan taki tæpar 2 klst. Grímannsfell sjálft er 482 m og er voldugt fjall sem getur tekið allt að 5 klst að ganga á, sem er of langt í síðdegis fjölskyldugöngu.
Mætið í útivistarfatnaði með húfu og vettlinga. Gott er að hafa bakpoka með heitt á brúsa og smá nestisbita og orku.
Grímannsfell
Lýsing
Grímannsfell er 482 m.y.s. efst í Mosfellsdal. Það er vinsæll takmark göngumanna og hægt að nálgast það á ýmsa vegu. Hér er gert ráð fyrir því að ganga frá bílastæði við Gljúfrastein í Mosfellsdal (GPS N. 64.10.870 W. 21.34.944) og fylgja stikaðri leið frá safninu meðfram ánni Köldukvísl.
Sagt er að nóbelsskáldið Halldór Kiljan Laxness hafi oft gengið þessa leið meðfram ánni sér til heilsubótar, fram að Helgufossi og til baka en fáum sögum fer af fjallgöngum hans.
Leiðin liggur meðfram Köldukvísl eftir merktri slóð. Fljótlega kemur göngumaður að fallegum fossi í ánni sem heitir Helgufoss. Þar er snotur áningarstaður og rústir af seli.
Gengið er upp með Helgufossi og að nýlegri göngubrú yfir Köldukvísl. Þar er snúið við og gengið sömu leið til baka.
Þátttaka er ókeypis - verið öll velkomin - mætið vel búin í góðum gönguskóm og útivistarfatnaði.
Fjölskyldugöngur á fellin í Mosfellsbæ
Hér er yfirlit yfir næstu ferðir.
- 5. maí kl. 17:30 Grímannsfell
- 12. maí kl. 17:30 Mosfell
- 19. maí kl. 17:30 Helgafell
