Búnaður

Pakkað fyrir trússferð eða bækistöðvarferð

Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.

Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.

Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.

Göngufatnaður

• Góðir gönguskór og mjúkir göngusokkar
• Nærföt, ull eða flís, eftir veðri
• Peysa úr ull eða flís
• Göngubuxur / stuttbuxur

Í dagpokanum

• Bakpokahlíf / plastpoki inni í bakpokanum
• Áttaviti, landakort og GPS tæki
• Smurt nesti fyrir daginn
• Göngunasl svo sem þurrkaðir ávextir, súkkulaði og hnetur
• Vatnsbrúsi
• Hitabrúsi með kakói, tei eða kaffi
• Göngustafir
• Myndavél og kíkir
• Sólgleraugu
• Sólarvörn og varasalvi
• Hælsærisplástur, plástur, teygjubindi og verkjalyf
• Salernispappír, blautþurrkur og litlir plastpokar fyrir notaðan pappír
• Húfa, vettlingar og buff um hálsinn
• Vind- og vatnsþéttur hlífðarfatnaður
• Legghlífar, vaðskór og broddar, ef þurfa þykir

Í trússtöskunni

• Svefnpoki og lítill koddi
• Bolur til skiptana og til að sofa í
• Auka nærbuxur og sokkar
• Höfuðljós
• Tannbursti og tannkrem
• Sápa / sjampó
• Lítið handklæði
• Eyrnatappar
• Skálaskór
• Peningar

• Núðlur eða pasta í pokum
• Pulsur eða foreldaðar kjúklingabringur
• Eitthvað gott á grillið
• Kol og uppkveikilögur
• Haframjöl
• Brauð og flatkökur
• Smjör og álegg, svo sem ostur, kæfa, hangikjöt
• Hrökkbrauð og kex
• Þurrkaðir ávextir, súkkulaði og hnetur
• Kakó, te og/eða kaffi
• Súpur
• Krydd, t.d. salt og pipar

Ef sofið er í tjaldi þarf að auki í trússtöskuna

• Tjald og tjalddýna
• Prímus og eldsneyti
• Eldspýtur
• Pottur
• Hitabrúsi og drykkjarbrúsi
• Diskur og drykkjarmál
• Hnífapör
• Vasahnífur / skæri
• Viðgerðasett, nál og tvinni, snæri og klemmur

Fróðleikur

Hátt rís Hrútfell

Hrútfell á Kili er fjall sem hátt rís. Það er metnaður margra fjallgöngumenn að toppa það fjall og njóta þess að puða upp brattar hlíðar og fá síðan fallegt útsýni yfir hálendið sem er einstakt. Hjónin Páll Ásgeir og Rósa Sigrún eru fararstjórar í þriggja daga ferð Ferðafélags Íslands á Kjöl. Hápunktur ferðarinnar verður 17 kílómetra ganga á Hrútfell sem er tæplega 1400 metra hátt. Hækkun á göngu er um 850 metrar.

Hrútfell er brattur stapi með jökulhettu á kollinum. Í hlíðum þess eru skriðjöklar. Í bókinni Íslensk fjöll segir að fjallið sé einna líkast Eiríksjökli. Stórfínt útsýni er af toppnum við réttar aðstæður. Langjökull blasir við göngumönnum í vestri. Í suðri sést yfir Hvítárvatn. Handan þess má sjá Bláfell og Heklu. Í austri eru Kerlingafjöll og Hofsjökull.

Gist verður í skála Ferðafélags Íslands í Þverbrekknamúla. Ekki er úr vegi að rifja upp harmsögu Reynistaðabræðra sem fórust nokkru norðar árið 1780 þegar þeir voru að reka fé sitt þvert yfir hálendið. Sjálfsbjargarviðleitni Norðlendinganna endaði með dauða þeirra við þann stað sem seinna hlaut heitið Beinhóll. Saga öræfanna, hrakninga, sigra og ósigra er við hvert fótmál.

Þar sem hvílt er í skála Ferðafélags Íslands og kyrrð óbyggðanna ríkir er ekki úr vegi að rifja upp sagnir frá liðnum tíma.