Fólk á fjöllum

Fólk á fjöllum

Eftir Reyni Traustason

Í bókinni er sagt frá ferðaævintýrum sex íslenskra útivistargarpa sem allir eiga það sameiginlegt að vera náttúrubörn og útivistarfólk auk þess að vera félagar í Ferðafélagi Íslands.

Þetta eru spennandi frásagnir af ævintýrum, svaðilförum og hetjudáðum þar sem ástin á óbyggðunum skín alls staðar í gegn. Söguhetjurnar eru sannar fyrirmyndir þeim sem vilja auka lífsgæði sín með útivist og ævintýrum í óbyggðum.

Reynir Traustason, höfundur bókarinnar er blaðamaður og fyrrum ritstjóri og hefur skrifað metsölubækur á borð við Ljósið í Djúpinu, Örlagasögu Rögnu á Laugabóli og Líf og leyndardóma Sonju W. Zorrilla. Undanfarin ár hefur hann stundað fjallamennsku af krafti. Samhliða blaðamennsku hefur hann verið skálavörður og fararstjóri hjá Ferðafélagi Íslands.

Kaflar í bókinni

• Fyrirmyndir á fjöllum: Formáli höfundar
• Á skíðum niður Herðubreið: Tómas Guðbjartsson
  • Tómas Guðbjartsson hjartaskurðlæknir hefur stundað fjallamennsku frá blautu barnsbeini og varð fyrst fararstjóri rétt kominn af barnsaldri. Í Kverkfjöllum og á Herðubreið er hann á heimavelli.
• Skálavörður á eldfjalli: Kerstin Langenberger
  • Kerstin Langenberger ljósmyndari, leiðsögumaður og fyrrum skálavörður í Landmannalaugum. Þegar Eyjafjallajökull gaus tjaldaði hún ofan við eiturgufurnar og náði stórkostlegum myndum.
• Lífsháski í jökulfljóti: Sigríður Lóa Jónsdóttir
  • Sigríður Lóa Jónsdóttir sálfræðingur hefur sérhæft sig í ferðalögum um Hornstrandir. Hún segir m.a. af fundi sínum með Brad Pitt á fjöllum.
• Með harmónikku á fjallatindum: Valtýr Sigurðsson
  • Valtýr Sigurðsson, fyrrum ríkissaksóknari, hörkutól og fjallaskíðamaður ferðast gjarnan með harmonikku á bakinu. Hann elskar söng og dans á tindum og fjallaskörðum.
• Harmur á Everest: Vilborg Arna Gissurardóttir
  • Vilborg Arna Gissurardóttir er afrekskonan sem gekk ein á Suðurpólinn og hefur klifið yfir 8000 metra fjall án súrefnis. Tvisvar hefur hún lent í lífsháska á Everest.
• Pólitískt lík mitt liggur á Eyjabökkum: Ólafur Örn Haraldsson
  • Ólafur Örn Haraldsson þjóðgarðsvörður og forseti Ferðafélags Íslands á að baki svaðilfarir yfir Grænlandsjökul og yfir Suðurskautslandið á Suðurpólinn.