Baugasel

Baugasel er upphaflega gamall torfbær í Barkárdal, eyðidal sem teygir sig vestur úr Hörgárdal inn í miðbik Tröllaskagans. Baugasel fór í eyði árið 1965. Dalurinn er girtur háum fjöllum og sá ekki til sólar í Baugaseli frá 4. október til 8. mars eða í 157 daga. Þar var fallegur torfbær sem Ferðafélagið Hörgur gerði upp sem gönguskála á árunum upp úr 1980. Jeppaslóð liggur frá þjóðvegi inn að Baugaseli sem er um 7 km leið.