Kynningarfundur Bakskóla Ferðafélag Íslands var haldinn í sal félagsin Mörkinni 6 í kvöld. Yfir 120 manns mættu á fundinn. Páll Guðmundsson framkvæmdastjóri FÍ sem er umsjónarmaður með Bakskólanum kynnti verkefnið. Bakskólinn hefst með gönguferð 4. apríl og verður boðið upp á þrjár gönguferðir í viku með liðkandi og styrkjandi æfingum.
,, Ég segi nú yfirleitt að það sé ánægjulegt að sjá fólk en átti þó erfitt með segja það í kvöld að það væri ánægjulegt að sjá hvað það væru margir slæmir í bakinu, en það væri þó ánægjulegt að sjá hversu margir vildu verða betri í bakinu," sagði Páll að loknum fundinum.
Páll á sjálfur 30 ára sögu um bakmeiðsli og bakmeiðslasaga hans náði hámarki sl. haust þegar hann fékk brjósklos. ,,Ég komst ekki í sokkana mína á morgnana og gat rétt staulast um og var alveg frá í sex vikur og var á leið í uppskurð. Þá fékk ég leyfi hjá lækni til að fara í léttar gönguferðir. Því meira sem ég gekk því betri varð ég og ég fór að ganga á fjöll og í náttúrunni í fjölbreyttu landslagi. Um leið gerði ég styrkjandi og liðkandi æfingar og hef náð miklum bata á skömmum tíma," segir Páll.
Bakskólinn hefst með gönguferð 4. apríl kl. 18 með gönguferð frá Árbæjarlaug.
Gönguferðir Bakskólans verða mánudaga og fimmtudaga kl. 18 frá Árbæjarlaug og á laugardögum kl. 10.30 frá Lágafellslaug í Mosfellsbæ.
Bakskólinn stendur í þrjá mánuði og kostar kr. 10.000 á mánuði. Þátttakendur geta tekið þátt endurgjaldlaust fyrstu vikuna en allir þurfa að skrá sig fyrir fyrstu göngu.
Gönguferðirnar taka 60 - 75 mínútur með liðkandi og styrkjandi æfingum. Eftir því sem líður á verkefnið verður tempóið í gönguferðunum aukið en hópnum er skipt niður í tvo til þrjá minni hópa eftir gönguhraða.
Þegar líður á verkefnið verður farið i fjallgöngur, 2 í apríl, 3 í mai og 4 í júní.
Helsti búnaður sem þátttendur þurfa eru góðir íþrótta/hlaupaskór og göngufatnaður / íþróttafatnaður.
Þegar farið er í fjallgöngur eða gönguferðir úti í náttúrunni er gott að vera í gönguskóm.
Göngustafir eru góðir fyrir þá sem vilja.
Páll Guðmundsson er íþróttakennari frá ÍKÍ á Laugarvatni og hefur meðal annars starfað sem íþróttakennari, íþróttaþjálfari og verið umjónarmaður með gönguhópum og fararstjóri hjá FÍ. Auk Páls verða sjúkraþjálfarar og kírópraktorar hópnum innan handar.
Skráning í Bakskólann er á skrifstofu FÍ Mörkinni 6 í síma 568 - 2533 eða með tölvupósti á fi@fi.is
