Ferðadraumar
Flest okkar muna æskudrauma um ferðir til fjarlægra staða og hvernig fjöll og fegurð landsins náðu
einhverjum undarlegum og sterkum tökum á okkur. Ekki þurfti nema að ganga upp í svolitla brekku þar sem útsýnis naut og þá þreyttumst við aldrei á að horfa yfir fallegt land og finna hvernig víðáttan togaði í okkur. Og einhvern veginn læddist að okkur sú tilfinning að fjarskinn og frelsið gætu átt samleið. Síðan þegar við stækkuðum varð okkur æ oftar litið á fjallið, bæði það sem stóð skammt ofan við heimilið okkar og háa tindinn langt úti við sjóndeildarhring. Og einhvern veginn læddist að okkur að ögrun og sætur sigur ættu samleið. Þegar við urðum fullorðin skildum við að glíman við fjallið er glíman við okkur sjálf og mesta ánægja ferðarinnar er samveran með góðum ferðafélögum.
Áætlun Ferðafélags Íslands er ætlað að kveikja ferðalöngun og láta síðan ferðadraumana rætast.
Með kveðju
Ólafur Örn Haraldsson
Forseti Ferðafélags Íslands
Stundum er sagt, rétt eins og sagan dæmir um, að fyrirtæki og félög lifi sjaldnast nema í fáeina áratugi. Saga Ferðafélags Íslands, sem verður 80 ára á þessu ári, er hins vegar undantekning frá þessari reglu. Félagið hefur sjaldan verið frískara en nú um stundir og starf þess öflugt, enda njóta ferðalög um landið mikilla og sívaxandi vinsælda. Fyrst og fremst hefur Ferðafélagið þó lifað sakir þess að það er vettvangur félagslynds fólks sem ann landinu og vill styðja við góð verkefni sem unnið er að hverju sinni.
Mörg járn í eldinum
Ólafur Örn segir að sem endranær hafi forysta Ferðafélags Íslands mörg járn í eldinum.
Það er brýnt að auka enn frekar þjónustu við félagsmenn, þar með talinn aðbúnað í fjölsóttustu skálunum, sem eru í Þórsmörk, Landmannalaugum, á Laugaveginum og í Nýjadal. Þá þurfum við að efla upplýsingaþjónustu félagsins enn frekar, þar með talið útgáfustarfið en á því sviði höfum við verið í sókn síðustu ár, meðal annars með ýmsum smáritum um landslag og leiðir. Í öndvegi eru þó árbækurnar sem komið hafa út allt frá stofnun félagsins, en til þeirra er jafnan vandað og fyrir vikið þykja þær algjör undirstöðurit um land, náttúrufar, örnefni og byggðahætti.
Engum vafa er undirorpið, að mati Ólafs Arnar, að starf Ferðafélags Íslands í tímans rás á ríkan þátt í ferðagleði Íslendinga og aukinni vitund fólks fyrir landinu og töfrum þess.
Frumkvæði félagsins á 80 ára ferli hefur tvímælalaust skapað góða og innihaldsríka ferðamenningu, aukið áræði og þekkingu margra til ferðalaga og byggt upp aðstöðu svo sem sæluhús, brýr, ferðaleiðir og fleira, segir Ólafur.
