Ferðafélaginn, 90 ára afmælisrit Ferðafélags Íslands, er komið út. Sneisafullt af fróðleik, upplýsingum og sögum af kraftmiklum og lífsglöðum félagsmönnum sem eiga án efa eftir að hafa jákvæð og hvetjandi áhrif á lesendur.
Af handahófi má nefna verkfræðinginn Begga sem heldur samviskusamlega bókhald yfir gengna kílómetra og hefur samkvæmt útreikningum gengið langleiðina út í geim. Tvíburana Örvar og Ævar, eða Örævar eins og margir þekkja þá, sem ákváðu í sameiningu að skipta um starfsvettvang um fimmtugt og skella sér í leiðsögunám. Elínborgu sem byrjaði gönguferilinn fyrir tilviljun um sextugt, hefur mætt í allar göngur Fyrsta skrefsins og Næsta skrefsins tvö ár í röð og lætur ekkert stoppa sig á 76. aldursárinu. Og Sigurð sem tók þátt í æfingaverkefninu Landvættir í fyrra, á sama tíma og hann greindist með sjaldgæfan taugarýrnunarsjúkdóm, og stefnir nú ótrauður á að klára Járnmanninn í sumar.
Starfsemi Ferðafélagsins hefur þróast mikið frá stofnun þess. Í Ferðafélaganum er 90 ára sagan rakin á skemmtilegan hátt og gömlum og glæstum sögum af afrekum félagsmanna í gegnum tíðina gerð skil. Þeir hafa margir hverjir unnið margra áratuga óeigingjarnt starf í þágu félagsins og á seinni árum má nefna Ólaf Örn Haraldsson forseta og Sigrúnu Valbergsdóttur varaforseta sem einmitt líta yfir farin veg. Þá fara nokkrir fararstjórar með lesendur í ferðalag um fallegar og áhugaverðar íslenskar slóðir.
Í þessu afmælisriti er einnig fjallað um þær nýjungar sem FÍ hefur bryddað upp á síðastliðin ár. Þar má nefna fjallaverkefni, lýðheilsu- og hreyfiverkefni sem og Ferðafélag barnanna og FÍ ung.
Ferðafélaginn er 120 blaðsíður að lengd og vel á annað hundrað nýrra og gamalla ljósmynda glæða síðurnar lífi. Ritið hefur nú verið sent til félagsmanna og við vonum að allir njóti lestursins.