Fræðsluerindi á vegum Hins íslenska náttúrufræðifélags. Fyrirlesari, Árni Hjartarson. Í erindinu segir hann frá Hallmundarhrauni og leyndardómum þess. Árni skoðaði eldstöðvar hraunsins á ferð með gönguhópi frá Ferðafélagi Íslands s.l. sumar undir leiðsögn Sigrúnar Valbergsdóttur.
Tími og staður, mánudagur 28. nóvember 2011 kl. 17.15 í stofu 132 í Öskju, húsi náttúrufræðinga við Háskóla Íslands.
Hallmundarhraun er meðal stærstu hrauna landsins, auðugt af hellum og ýmis konar hraunmyndunum og miklar lindir og lindasvæði tengjast því. Það er ungt og að öllum líkindum frá landnámsöld en aldursgreiningar á því eru misvísandi. Greint verður frá áhrifum hraunrennslisins á byggð og byggðasögu Borgarfjarðar. Nokkrir bæir virðast hafa horfið í hraunið og ýmis örnefni og forn landamerki gefa vísbendingar um aðstæður á svæðinu áður en hraunið rann. Ýmsar sagnir tengjast Hallmundarhrauni, ekki síst um jötna og útilegumenn. Hið forna og torræða kvæði Hallmundarkviða er talin lýsa eldgosinu og hraunrennslinu. Frá náttúrufræðilegu sjónarmiði er kviðan einn merkilegasti texti fornritanna en hefur lengst af verið vanmetin sem slík. Hún lýsir eldsumbrotum og viðhorfum heiðinna manna til þeirra og setur hamfarirnar í goðsögulegt samhengi. Í kvæðinu er greint frá aðdraganda gossins, gangi þess og ýmsum afleiðingum. Í erindinu verða settar fram tilgátur um aldur Hallmundarkviðu og höfund hennar, tímasetningu eldsumbrotanna og tímaskeið Hellismanna.
