Húsfyllir á myndakvöldi

Um 150 manns mættu á myndakvöld Ferðafélags Íslands á miðvikudagskvöld. Þar voru sýndar myndir úr skíðaferðum um fjöll og jökla að vetrarlagi. Einar Ragnar Sigurðsson sýndi myndir úr ferðum um Laugaveginn á skíðum og ferð þvert yfir Vatnajökul sumarið 1997.
Páll Ásgeir Ásgeirsson sýndi myndir úr skíðaferðum um Síðuafrétt og inn í Öskju veturna 2008 og 2009. Fjöldi gesta endurspeglar mikinn áhuga á ferðum af þessu tagi og nokkrar umræður urðu um búnað og skipulag í ferðum af þessu tagi.
Þarna voru margir ungir og áhugasamir skíðagarpar en í hópi gesta mátti einnig sjá marga þeirra sem fást við skíðaferðir af þessu tagi,  eiga marga svaðilför að baki og eru enn á ferðinni þegar ofan gefur snjó á snjó. Þarna voru líka jöklafræðingar og vísindamenn og nokkrir af elstu og virtustu félögum Jöklarannsóknarfélags Íslands,  nafntogaðir fararstjórar og fjallarefir.