Góð vísa er aldrei of oft kveðin. Það er mjög mikilvægt fyrir ferðamenn að vera vel búnir í ferðum sínum um hálendið. Göngufatnaður, hlífðarfatnaður, bakpoki, nesti, gps tæki og fjarskiptabúnaður er nauðsynlegur í allar lengri ferðir. Þá er mikilvægt að kynna sér veðurspá, þekkja leiðina og skilja eftir ferðaáætlun á www.safetravel.is
Öll þessi atriði og fleiri til heyra undir góðan undirbúning fyrir ferð. Með góðum undirbúningi má auka öryggi og ánægju í ferðinni.
Flestir ferðamenn eru vel búnir og hafa vandað til undirbúnings ferðar. Því miður eru þó alltaf einhverjir sem eru vanbúnir og illa búnir og hafa ekki áttað sig á aðstæðum sem þeir geta lent í á hálendi Íslands.
Ferðafélag Íslands og safetravel.is hafa nú sett upp skilti á helstu áfangastöðum á Laugaveginum sem varar fólk við að leggja af stað ef það er ekki rétt útbúið. Það var Árni Tryggvason sem hannaði skiltið fyrir FÍ og safetravel.