Óveður við gosstöðvarnar
Óveður geisar nú á Fimmvörðuhálsi og engir ferðamenn eru á gossvæðinu; björgunarsveitarmenn tryggja að fólk haldi ekki af stað í óveðrið. Veður gengur ekki niður að ráði fyrr en á miðvikudaginn.
Töluverð umferð var á gosstöðvunum í gær en þó minni en dagana á undan. Veður var eins og best verður á kosið, hægviðri, léttskýjað og lítið frost. Flestir voru samankomnir á svæðinu um níuleytið í gærkvöldi til að fylgjast með gosinu í ljósaskiptunum. Umferð ökutækja af svæðinu tók að þyngjast um tíuleytið en þá var nánast bíll við bíl á Mýrdalsjökli. Á sjötta tug björgunarsveitarmanna stóð vaktina en síðasti jeppinn fór af Fimmvörðuhálsi um tvöleytið í nótt.
Samkvæmt upplýsingum frá Veðurstofunni mældust nokkrir litlir jarðskjálftar undir austurhluta Eyjafjallajökuls upp úr miðnætti. Þar undir er uppstreymi kvikunnar en gosóróinn á svæðinu er svipaður og verið hefur undanfarna daga.
Ekkert ferðaveður er við gosstöðvarnar þessa stundina en búist er við stormi á svæðinu. Þar er nú töluverð snjókoma og búist við vindhraða upp á allt að 26 metra á sekúndu. (www.ruv.is)
Ferðafélag Íslands aflýsti ferð að gosstöðvunum í gærdag vegna veðurs.
