Óskað eftir tilnefningum til Kuðungsins 2024
Óskað eftir tilnefningum til Kuðungsins 2024
Umhverfis-, orku- og loftslagsráðuneytið óskar eftir tilnefningum um fyrirtæki eða stofnun, sem vegna verka sinna og athafna á síðasta ári eru þess verðug að hljóta umhverfisviðurkenninguna Kuðunginn fyrir árið 2024. Kuðungurinn er veittur fyrir heildarframmistöðu fyrirtækis í umhverfismálum á liðnu ári, ekki fyrir eitt stakt verkefni.
Kuðungurinn verður afhentur í tengslum við Dag umhverfisins og hefur sú breyting verið gerð á að tilnefningaflokkarnir eru nú tveir, fyrir stærri og minni fyrirtæki.
Óskað er eftir því að greinargerð fylgi með tilnefningunni, en við mat á viðurkenningarhöfum er horft til eftirfarandi þátta: Umhverfisstjórnunar, innleiðingar nýjunga í umhverfisvernd, losun gróðurhúsalofttegunda, minni efnanotkunar, lágmörkunar úrgangs, mengunarvarna, umhverfisvænni þróun á vöru eða þjónustu, framlags til umhverfismála, samstarfs í umhverfismálum og vinnuumhverfis.
Fyrirtæki og stofnanir geta bæði tilnefnt sig sjálf eða verið tilnefnd af öðrum.
Tillögur skulu berast umhverfis-, orku- og loftslagsráðuneytinu eigi síðar en 10. mars nk. merktar „Kuðungurinn“ á netfangið urn@urn.is eða með pósti í umhverfis-, orku- og loftslagsráðuneytið, Borgartúni 26, 105 Reykjavík.
Á síðasta ári hlutu fyrirtækin Sorpa og Bambahús viðurkenningu fyrir framúrskarandi starf að umhverfismálum á árinu 2023. Þá hlaut Lögreglan á Vesturlandi sérstaka hvatningarviðurkenningu dómnefndar fyrir framsýni og eftirtektarverðan samdrátt í losun.
