Fréttir

Árbókarferð FÍ í Dalinu í gærdag var vel heppnuð.  Um áttatíu þátttakendur slógust þá í för með Árna Björnssyni höfundi ábókar og óku um sögusvið bókarinnar undir leiðsögn Árna. ,,Þetta var mjög skemmtilegt og vel heppnað, " sagði Jóhannes Ellertsson einn þátttakenda í ferðinni.  Ekið var um Bröttubrekku og að Eiríksstöðum, þaðan að Laugum í Sælingsdal, þá Skarðsströnd með viðkomu að Skarði, Svínadalinn til baka og í Búðardal og þaðan Laxárdalsheiði yfir í Hrútafjörð og til Reykjavíkur.  Alls tók ferðin um 14 tíma.

Sunnudaginn 21. ágúst er boðið upp á gönguferð um Síldarmannagötur, forna þjóðleið úr Hvalfirði yfir að Fitjum í Skorradal. Fararstjóri er Eiríkur Þormóðsson. Skráning á skrifstofu FÍ.

Í vikunni skrifuðu  Hermann Guðjónsson forstjóri Siglingastofnunar og Ólafur Örn Haraldsson  forseti Ferðafélags Íslands undir samning til fimmtán ára um afnot vitavarðarbústaðarins við Hornbjargsvita í Látravík. Þar var samþykkt að ferðafélagið fær bústaðinn til afnota endurgjaldslaust gegn því að sinna viðhaldi og endurbótum á mannvirkjum og aðstöðu sem nauðsynleg er til reksturs ferðaþjónustu á staðnum.

Ferðafélag Íslands efnir til árbókarferðar vestur í Dali með Árna Björnssyni þjóðháttafræðingi og höfundi árbókar  2011. Ferðin er dagsferð og verður farin sunnudaginn 14. ágúst. Farið er víða um héraðið og meðal annars komið við á sögufrægum stöðum sem fjallað er um í bókinni.

Ganga umhverfis Hítarvatn í Hítardal. Gangan hefst við skálann við Hítarvatn. Þessari ferð hefur verið aflýst.  

Lagt af stað frá Mörkinni 6 kl. 8 á laugardegi og ekið um Þjórsárdal inn á Gnúpverjaafrétt að Dalsá. Haldið að Dynk og á Kóngsás. Gist er í skála í Hólaskógi þar sem er sameiginlegur heitur matur.

Sunnudaginn 28. ágúst verður Esjudagur FÍ og Valitors haldin. Ferðafélag barnanna býður öllum börnum í ókeypis gönguferð. Jarðfræðingar og sagnfræðingar mæta. Fjölskylduskemmtun á bílastæði við Mógilsá. Þáttaka ókeypis og allir velkomnir.

Nú hefur verið sett upp aukaferð um Vatnaleiðina svokölluðu þar sem gengið er að Hlíðarvatni, Hítarvatni, Langavatni og Hreðavatni auk þess sem gengið verður hæstu fjöll á leiðinni.  Fararstjórar eru þeir fjallabræður Örvar og Ævar.....

Ferðafélag Íslands og Landvernd standa saman að nokkrum ferðum á hverju sumri.  Í sumar hafa verið farnar bæði dagsferðir og lengri ferðir,  m.a. í Kerlingarfjöll og á Reykjanesskaga.   Síðustu gönguferð Landverndar og Ferðafélags Íslands í sumar er heitið í Vonarskarð sem er víðerni í Vatnajökulsþjóðgarði. Tilgangur ferðarinnar er að kanna eina af fágætum perlum íslenskrar náttúru, - hverasvæði sem skartar m.a. óvenju litríkum hveraörverum. Kristján Jónasson sviðsstjóri og jarðfræðingur á Náttúrufræðistofnun verður með í för og fræðir hópinn um þau merkilegu fyrirbæri sem á vegi göngufólks verða.  Ferðin í Vonarskarð er liður í gönguferðum Landverndar og Ferðafélags Íslands um jarðhitasvæði. Yfirlýst markmið samtakanna er að skoða svæðin út frá sjónarhóli náttúruverndar, hugleiða möguleg áhrif orkuvinnslu á þau og njóta um leið útivistar í sérstæðu landslagi í einkar gefandi félagsskap. Ferðir Landverndar hafa mælst vel fyrir og sérfróðir leiðsögumenn gert sitt í því að skapa frjóa umræðu um sérkenni svæðanna, náttúruvernd og þýðingu hennar fyrir þau jarðhitasvæði sem ferðast er um. Umræður í bland við fræðslu hafa gefið ferðunum ómetanlegt gildi og göngufólk snúið heim bæði ríkt af fróðleik og tilfinningu fyrir landinu.    Þeir sem hafa áhuga á að skrá sig í ferðina eru beðnir að hafa samband við Ferðafélag Íslands í síma 568 2533.   Ferðalýsing Vonarskarð - víðerni í Vatnajökulsþjóðgarði Brottför föstudag 12. ágúst kl. 16 frá Mörkinni 6 Ekið frá Reykjavík í náttstað í Nýjadal. Að morgni laugardags ekið inn á Gæsavatnaleið að Gjóstuklifi. Þaðan er gengið inn að jarðhitasvæðinu í fjalllendinu suður og vestur af Laugakúlu. Farið í bað í varmá sem rennur úr kolsýruhverum sunnan undir kúlunni. Leirhverir, leirugir vatnshverir, kolsýrulaugar og -hverir ásamt hveraörverum í afrennsli setja svip sinn á háhitasvæðið. Stærsta eldstöð landsins, Bárðarbunga, rís tilkomumikil yfir víðernið í Vonarskarði. Litfögur líparítfjöllin, Eggja og Skrauti, móbergsfjöll og grásvartir sandar einkenna landslag. Frá hverasvæðinu er gengið í Snapadal áður en haldið er tilbaka í náttstað í Nýjadal. Drjúg dagleið. Á sunnudag verður gengið upp að jaðri Tungnafellsjökuls áður en lagt verður af stað heim. Kvíslaveitur skoðaðar á leiðinni til Reykjavíkur. Heimkoma áætluð um kl. 19.00.

Ferðafélag Íslands hefur tekið við rekstri Hornbjargsvita af þeim hjónum Ævari Sigdórssyni og Unu Lilju Eiríksdóttur.  FÍ gerir langtímasamning við Siglingastofnun um rekstur og viðhald á húsum á svæðinu.  Pantanir á gistingu í Hornbjargsvita fer nú fram á skrifstofu FÍ.