Fréttir

Fjall mánaðarins í apríl er Kerhólakambur Esju Fjórða ganga verkefnisins Eitt fjall á mánuði 2012 á vegum Ferðafélags Íslands verður  farin laugardaginn 28 apríl.  Fyrirhugaðri göngu á Hátind Esju verður frestað þar til síðar. Aðastæður á þeirri leið eru erfiðar nú þegar snjór er að hverfa úr fjöllum og hrun er á lausum steinum á bröttum kafla gönguleiðarinnar. Sjá nánar >>

Ferðafélag Íslands og Landvernd standa saman að dagsferð 2. júní um jarðhitasvæðin við vesturjaðar Reykjanesfólksvangs.  Frá Reykjanesbraut verður ekið um Afstapahraun að Höskuldarvöllum og Trölladyngju. Gengið verður upp á hæðina sem eftir stendur af Eldborg við Trölladyngju og horft yfir jarðhitasvæðið en gígurinn er hornpunktur í Reykjanesfólkvangi. Frá Trölladyngju verður ekið að borholu HS Orku í hrauninu vestur af Sogum þar sem rútan verður yfirgefin. Þar er ætlunin að skoða jarðhitasvæði ásamt sprengigíg í hrauninu. Síðan verður gengið upp í Sogin, farið yfir myndunarsögu þeirra og litið á jarðhitann. Farið verður að Spákonuvatni en á þeirri leið fæst góð sýn yfir Sogin og gígasvæðið vestan undir Núpshlíðarhálsi en þar er upptakasvæði Afstapahrauns sem runnið hefur allt til sjávar í Vatnsleysuvík.

Sumardaginn fyrsta gekk 70 manna hópur á vegum Ferðafélags Íslands á Eyjafjallajökul í blíðskaparveðri. Þar var á ferð hópur sem kallast Framhaldslífið en flestir í í hópnum tóku þátt í verkefni FÍ 52 fjöll á ári 2011. Farið var upp frá Seljavöllum. Um svipað leyti var á ferð á jöklinum annar hópur frá Félagi íslenskra fjallalækna (FÍFL). Með þeim var laus Labrador hundur, Tinni að nafni. Tinni féll í jökulsprungu í 1530 metra hæð skammt vestan við Guðnastein. Forsvarsmenn hópsins höfðu samband við FÍ hópinn og leituðu aðstoðar. Guðmundur Sveinbjörn Ingimarsson, einn fararstjóra FÍ seig 15 metra niður í sprunguna og kom sigbelti utan um Tinna sem var dreginn upp heill á húfi. Guðmundi til aðstoðar var Ólafur Þór Rúdólfsson sem einnig var í hópi fararstjóra FÍ. Þeir Guðmundur eru þrautþjálfaðir björgunarmenn.Allt er gott sem endar vel og gönguhópurinn sat í sól og logni rétt við vettvanginn meðan þessu fór fram og annaðist fagnaðarlæti þegar bæði Tinni og Guðmundur voru komnir aftur upp úr iðrum jökulsins.

Laxnesshátíðin Í fótspor skáldsins kl. 11 á morgun - laugardagKammerkór Norðurlands í Hörpu á sunnudaginnLaxness í lifandi myndum og Bernska skálds í byrjun aldar á mánudaginn Vinafélag Gljúfrasteins býður uppá göngu um miðbæ Reykjavíkur í fylgd Péturs Ármannssonar, arkitekts.  Gangan hefst við Laugaveg 32, fæðingarstað Halldórs Laxness,  laugardaginn 21. apríl kl 11:00 og endar við Vesturgötu 28, sem var  heimili hans á stríðsárunum. Pétur mun miðla fróðleik um ýmis hús þar sem Halldór hafði viðkomu um  lengri eða skemmri tíma á yngri árum. Sigrún Valbergsdóttir og Birgir D. Sveinsson munu lesa örstutt textabrot sem  tengjast þessum tíma í lífi hins unga manns. Sum húsanna standa enn, önnur eru horfin. Allir eru velkomnir – bærinn er stór!

Dagsferð í Þórsmörk og Goðaland til að skoða ummerki gossins á Fimmvörðuhálsi. Brottför frá Mörkinni 6 kl. 8 og komið að Strákagili um kl. 11. Þaðan er lagt af stað upp Kattarhryggi og Morinsheiði að Magna og Móða. Áætlað er að koma til baka niður að rútu um kl. 16. Komið til Reykjavíkur að kvöldi. Fararstjóri: Bjarni Már Gylfason Verð: 18.000 / 21.000 Innifalið: Rúta og fararstjórn. Skráning og greiðsla fer fram á skrifstofu föstudaginn 20. apríl

Ef þú ert Íslendingur og leggur að auki einhverja stund á fjallgöngur þá er einboðið að Hvannadalshnúkur sé á verkefnalistanum og það jafnvel oftar en einu sinni, því nær himninum verður ekki komist hér á landi, alls 2.110 metra yfir sjávarmál. Með réttum undirbúningi og góðri leiðsögn er ganga á Hvannadalshnúk næsta auðveld hverjum fullfrískum manni, jafnt þindarlausum unglingum sem úthaldsgóðum öldungum. Gangan sem slík er ekkert sérstaklega erfið og krefst engrar sérkunnáttu eða tækni. Erfiðleiki göngunnar felst fyrst og fremst í því að þetta er afar löng fjallganga eða 12-15 klst, eftir því hvernig færið er á jöklinum sjálfum. Í Öræfum er að finna yfir 90 tinda hærri en þúsund metrar og hægt er að gleyma sér í fjallaskoðun hvert sem litið er. Skriðjöklar Öræfajökuls hafa hopað gríðarmikið á síðustu árum og sífellt kemur nýtt landslag í ljós undan jökli. Þannig geta jafnvel þeir sem gengið hafa á Hnúkinn áður uppgötvað ný og óséð jöklasker og hamraveggi. Virkisjökulsleiðin sem fyrir áratug var oftast gengin upp á topp er nú illfær og því er farin svokölluð Sandfellsleið, sem reyndar er sú leið sem helst var farin fyrr á öldum. Lagt er af stað við eyðibýlið Sandfell sem var í miðju hamfaranna í tvö síðustu skiptin sem Öræfajökull gaus, þ.e. árin 1362 og 1727. Þarna iðar hver þúfa af sögu sem gaman er að rifja upp á þeirri löngu göngu sem framundan er. Leiðin liggur upp brattar hlíðar Sandfellsins, upp á Sandfellsheiðina og þaðan að jökulröndinni í um 1.100 metra hæð þar sem hópnum er skipt upp í átta manna göngulínur. Á göngunni opnast smám saman útsýni að baki göngufólks yfir Ingólfshöfða, svartan Skeiðarársand og fjöllin hinum megin sands með Lómagnúp í forgrunni. Eftir sjöhundruð metra hækkun í viðbót er komið upp á brún Öræfajökulsöskjunnar og hinn fyrirheitni Hvannadalshnúkur blasir við, auk allra hinna öskjutindanna svo sem Sveinstinds og Snæbreiðar. Nú tekur við ganga yfir öskjuna sjálfa, skammt frá vestari öskjubrúninni, fyrir ofan hina hrikalegu skriðjökla Falljökul og Virkisjökul. Framundan blasir Hnúkurinn við og hinn ægifagri Dyrhamar.  Við rætur Hvannadalshnúks þarf að setja á sig göngubrodda og draga fram ísöxina og svo tekur við snörp tvöhundruð metra hækkun upp á sjálfan toppinn. Þegar upp er komið gleymast allar raunir göngunnar löngu, því útsýnið er engu líkt og hæðin er slík að sjóndeildarhringurinn fær bogadregna víðlinsu-ásýnd, svipað og myndir sem teknar eru utan úr geimnum! Því hefur verið haldið fram að ganga á Hvannadalshnúk sé lengsta dagleið á fjöllum í gervallri Evrópu og víst er rétt að óvíða erlendis tíðkast það að taka tvö þúsund metra hækkun á einum degi. Gangan reynir ekki síður á andlegt úthald þátttakenda en líkamlegt því göngumenn eru stóran hluta leiðarinnar fastir í línu, einir með sjálfum sér og sínum hugsunum. Hægt er að fullyrða að sú andlega næring og innhverfa íhugun sem út úr því fæst jafnist á við vikudvöl á indversku jógasetri. Hver sá sem sigrar Hvannadalshnúk hefur ekki aðeins gengið á hæsta fjall Íslands, heldur líka stærsta eldfjall landsins og það fjórða stærsta í Evrópu. Menn eru fullsæmdir af því afreki og geta með réttu gortað sig á mannamótum um ókomna tíð.

Nafnfræðifélagið heldur fræðslufund laugardaginn 21. apríl nk., kl. 13.15 í stofu 201 í Odda, húsi Háskóla Íslands.  Ragnhildur Helga Jónsdóttir umhverfislandfræðingur heldur fyrirlestur sem hún nefnir Skráning örnefna í Borgarfirði Á síðustu 20 árum hefur verið unnið mikið starf við skráningu og kortlagningu örnefna í Borgarfirði, bæði á vegum Félags aldraðra í Borgarfjarðardölum og sem BS-verkefni í landfræði við Háskóla Íslands. Reynslan hefur sýnt að það er hver að verða síðastur að ná til heimildarmanna sem þekkja örnefnin og staðsetningu þeirra. Síðustu misseri hefur verið unnið að skráningu

Næsta myndakvöld FÍ verður haldið miðvikudaginn 11. apríl kl. 20 í sal félagsins Mörkinni 6. Þá sýna Ferðafélag Fljótsdalshéraðs, Ferðafélag Fjarðarmanna og Ferðafélagið Norðurslóð myndir af sínum starfssvæðum og úr ferðum félaganna. Aðgangseyrir kr. 500, innifalið kaffi og kleinur. Allir velkomnir.

31-35% afsláttur af FerðaAski í dag 11.apríl á aha.is. Í boði er FerðaAskur fyrir dagsferðir, 2 daga og 3 daga (miðstærð). Inneignarnótan gildir til 1.ágúst svo hægt er að panta sér FerðaAskinn þegar ykkur hentar í sumar. Ekki missa af þessu einstaka tilboði Sjá nánar hér  www.ferdaaskur.is

Velkomin(n) á fyrirlesturinn High Adventure með ævintýrakonunni Renötu Chlumska á vegum Félags Íslenskra FjallaLækna (FÍFL) og 66°NORÐUR í Háskólabíói miðvikudaginn 11. apríl 2012. Kl 20.00Renata Chlumska er 39 ára þriggja barna móðir sem hefur verið útnefnd af Outdore Magazine sem ein af fremstu ævintýrakonum heims. Hún var fyrst sænskra kvenna að ná tindi Everestfjalls og hefur lagt að baki fjölda annarra tinda, m.a. Shishapangma (8006 m) án viðbótarsúrefnis. Afrek hennar eru ekki bundin við fjallgöngur heldur ná einnig til hjólreiða og siglinga, til dæmis hjólaði hún frá Nepal til Stokkhólms á 4 mánuðum. Árið 2005 hjólaði hún og reri á kajak yfir 48 ríki Bandaríkjanna en ferðin tók næstum eitt og hálft ár og voru þá 18.500 km að baki. Næsta haust verður hún fyrsta sænska konan til að ferðast út í geiminn. Á undan fyrirlestri Renötu munu FÍFLin Tómas Guðbjartsson og Ólafur Már Björnsson segja stuttlega frá nokkrum háfjallaperlum Íslands, m.a. göngu á Miðfellstind, Snækoll og Kverkfjöll.  Einnig verður stutt kynning á nokkrum nýjungum frá 66°NORÐUR, þar á meðal verðlaunajakkanum Snæfelli og valdar flíkur verða seldar á staðnum með sérkjörum.Allir velkomnir. Aðgangur er ókeypis.