Fréttir

Christopher Lund og Haukur Snorrason troðfylltu sal Ferðafélags Íslands á myndakvöldi í gærkvöldi. Myndir þeirra félaga vöktu mikla athygli og aðdáun, sérstaklega myndir Lunds frá Langasjó og nágrenni. Loftmyndir Hauks fengu einnig sterk viðbrögð og líflegar frásagnir þeirra félaga kölluðu á fjölda spurninga úr sal. Firnagóð stemmning og fróðleikur að ógleymdum kaffiveitingum í hléi. Talnaglöggir töldu að rúmlega 200 manns hefðu verið á staðnum.

Fimmtudaginn 18. mars, verður sérstakur fyrirlestur á Hótel Hilton Nordica sem er haldinn á vegum Félags Íslenskra Fjallalækna Þar mun Michael P. Grocott,  halda fyrirlestur um ferð sína og félaga sinna á Mt. Everest vorið 2007, The Xtreme Everest Expedition.

Næstkomandi sunnudag, 21. mars efna Ferðafélag Ísland og sælgætisgerðin Góa til sérstakrar páskaeggjagöngu á Móskarðshnúka. Gangan hefst kl. 10.00 á sunnudagsmorgun og allir þátttakendur fá að lokinni göngu páskaegg eða ámóta gómsætan glaðning frá Góu. Gangan hefst við Skarðsá undir Móskarðshnúkum. Til að komast þangað er best að beygja til vinstri rétt ofan við Gljúfrastein í Mosfellsdal og aka afleggjara merktan Hrafnhólar. Við túngarðinn á Hrafnhólum er beygt niður með ánni og stefnt inn í dalinn að sumarbústöðum og þarf að opna hlið á leiðinni. Vegurinn endar á bílastæði við göngubrú yfir Skarðsá. Þórður Marelsson verður fararstjóri og leiðir hópinn upp á Móskarðshnúka en sá hæsti er 820 metra hár. Gangan ætti því að taka 3-4 tíma og verður gott að fá sér súkkulaði að launum eftir frískandi fjallgöngu.

 Á næsta myndakvöldi Ferðafélags Íslands 17. mars n.k. verður landslag skoðað með augum ljósmyndara. Tveir atvinnuljósmyndarar sem jafnframt eru áhugasamir ferðalangar sýna ljósmyndir sínar af íslensku landslagi og útskýra fyrir áhorfendum ýmis tæknileg atriði varðandi ljósmyndatöku af landslagi og myndbyggingu. Fyrst sýnir Christopher Lund myndir sem hann hefur tekið víðsvegar um Ísland. Christopher tilheyrir yngri kynslóð ljósmyndara en hefur víða ferðast og virt fyrir sér fósturjörðina gegnum linsur af ýmsu tagi. Sýning hans ber yfirskriftina: Landið gegnum linsu. Eftir kaffi sýnir Haukur Snorrason ljósmyndari og flugkappi myndasýningu sem kallast:  Ísland úr lofti. Haukur er einnig meðal yngri ljósmyndara en hefur ferðast mjög mikið um Ísland og má segja að ljósmyndir hans af Íslandi úr lofti hafi vakið verðskuldaða athygli á honum um langa hríð en Haukur hefur gert nokkrar ljósmyndabækur. Myndakvöldið fer fram í sal Ferðafélags Íslands í Mörkinni 6 og hefst kl. 20.00 að vanda. Aðgangseyrir er kr. 600 sem verið hefur og í hléi eru kaffiveitingar með bakkelsi.

Esjuátakinu sem stóð alla vikuna með daglegum göngum á fjallið lauk á föstudagsmorgun. Þá gengu 27 manns á fjallið undir stjórn Þórðar Marelssonar og skörtuðu Cintamani húfum sem þeir höfðu fengið í verðlaun fyrir þátttöku alla dagana.

Ferðafélag Austur-Skaftfellinga var stofnað 9. mars 1980 og er því 30 ára um þessar mundir. Rannveig Einarsdóttir, formaður félagsins sagði í samtali við heimasíðu FÍ að félagsmenn horfðu glaðir til framtíðar á þessum tímamótum og rífandi gangur væri í starfinu. Félagið rekur einn skála, Múlaskála í Lónsöræfum og hefur gistináttum þar fjölgað verulega milli ára og mikið bókað í sumar. Sunnudaginn 14. mars kl. 14.00  verður afmæliskaffi í Nýheimum á Höfn þar sem félagsmenn og velunnarar fagna saman og deila minningum og myndum. Dregið verður í lukkuleik Strandgöngu sem staðið hefur yfir og  ferðadagskrá komandi sumars kynnt.

FÍ fjör í Esjunni, Esjan alla daga 8. - 12. mars.  Ferðafélag Íslands býður upp á gönguferðir með fararstjórn alla daga 8. - 12. mars. Þeir sem mæta í allar göngurnar fá glæsilega Cintamani húfu í verðlaun merkta FÍ.  Fararstjóri er hinn síungi Þórður Marelsson.  Ef veður leyfir verður reynt að fara aðrar leiðir á fjallið en hina hefðbundnu. Sjá nánar hér að neðan. Brottför er ávallt kl. 18.00. Tilvalið fyrir þá sem eru að undirbúa sig fyrir gönguferðir sumarsins,  Hvannadalshnúk eða annað.  Eins er þetta afar góð aðferð fyrir þá sem vilja missa nokkur kg á skömmum tíma.  

Aðalfundur Ferðafélags Íslands verður haldinn miðvikudaginn 10. mars kl. 20 í sal félagsins Mörkinni 6. Á dagskrá eru hefðbundin aðalfundarstörf. Stjórnin

4. mars hófust gönguferðir fyrir eldri og heldri borgara á vegum Ferðafélags Íslands. Gönguferðirnar eru á þriðjudögum og fimmtudögum og hefjast ávallt kl. 14.00. Á þriðjudögum hittast þátttakendur við Árbæjarlaug en þaðan er auðvelt að komast inn á kerfi gangstíga sem teygir sig um allan Elliðaárdal og upp að Elliðavatni. Á fimmtudögum hittast menn og konur svo við Nauthól í Nauthólsvík kl. 14.00 og þaðan liggja stígar meðfram sjónum í báðar áttir og hlykkjast ennfremur um alla Öskjuhlíðina. Ferðafélagið leggur til fararstjóra í þessar gönguferðir og hefur Alfreð Hilmarsson tekið þetta verkefni að sér fyrir félagið en Alfreð er vaskur göngugarpur sem er enn léttur á fæti þótt árunum fjölgi. Þetta verkefni er unnið í samvinnu við Valitor sem hefur átt náið og gott samstarf við Ferðafélag Íslands í nokkur ár. Allar rannsóknir sýna að fátt er betri heilsubót til sálar og líkama en að taka sér hressandi gönguferð með skemmtilegu fólki. Í þessum ferðum er vegalengd og gönguhraði stilltur í samræmi við virðuleika þátttakenda og meðalaldur hópsins hverju sinni.

Félagið Slóðavinir stendur fyrir fundi í kvöld 3. mars kl. 20.00 í húsakynnum Arctic Trucks, Kletthálsi 3. Þar flytja erindi þeir Ómar Ragnarsson ferðalangur og fjölmiðlamaður og Andrés Arnalds fagmálastjóri hjá Landgræðslu ríkisins. Þeir fjalla báðir, hvor með sínum hætti um slóðamyndun, utanvegaakstur og gróðureyðingu samfara aukinni umferð. Nokkur umræða hefur verið opinberlega undanfarið ekki síst að frumkvæði Andrésar sem haldið hefur erindi sem vakið hafa töluverða athygli. Fundurinn er opinn öllum sem áhuga hafa á ferðamennsku og útivist