Fréttir

Góð mæting var í grásleppugöngu FÍ í gær á Esjuna en boðið er upp á þrjár grásleppugöngur þessa vikuna og er næstu göngur í dag og á morgun. Gönguferðir á Esjuna, þriðjudag, miðvikudag og fimmtudag.  Þátttökugjald er 10 grásleppur eða kr. 1000,- í hverja ferð. Allar göngurnar hefjast kl.18.00. Þátttakendur greiða á staðnum í grásleppubaukinn.  Farastjóri Þórður Marelsson

Síðsumarsskreppa bíladeildar FÍ verður farin 1. ágúst og er fyrsta gistinótt í Norðurfirði á Ströndum.  Fararstjóri í ferðinni er Gísli Ólafur Pétursson. Nánari upplýsingar má finna á heimasíðu Gísla: http://www.gopfrettir.net/open/farplan/

Nú stendur yfir ferðin í fríi frá Facebook sem er sérstök unglingaferð þar sem dvalið er í skála FÍ í Norðurfirði.   .  Að sögn skálavarðar í Norðurfirði, Guðrúnar Lárusdóttur er mikil stemming í hópnum....

Sumarleyfisferð FÍ í Þjórsárver er nú lokið. Alls tóku 30 göngugarpar þátt í ferðinni sem stóð yfir í 6 daga.  Gísli Már Gíslason prófessor og fararstjóri í ferðinni segir ferðina hafa verið ánægjulega.  .

Ferðafélagið hefur nú lokið við að endurbyggja gömlu Kónsbrúnna yfir Brúará.  Framkvæmdir stóðu yfir í 10 daga og lauk framkvæmdum í gær.  Nýja brúin er hin veglegasta og er göngubrú  yfir Brúará þar sem Kóngsvegurinn liggur í landi Efstadals og Syðri Reykja, uþb. 10 km neðan við Brúárárskörð.  Fjölmargar skemmtilegar gönguleiðir eru á svæðinu.  Ferðafélag Íslands tók verkið að sér að beiðni Bláskógabyggðar og var verkið styrkt af Vegagerðinni.

Ferðafélag Íslands boðaði til stofnfundar Ferðafélags Barnanna mánudaginn 22.júní sl. Starfsemi Ferðafélags barnanna verður kynnt nánar á næstu misserum en boðið verður upp á ferðir og fræðslu af ýmsu tagi fyrir börn og foreldra. Félagsgjald í Ferðafélagi barnanna er kr. 1000. Innifalið í félagsgjaldi er félagskírteini og þátttaka í ferðum og viðburðum og vegum félagsins. Hægt er að skrá sig í Ferðafélag barnanna með því að senda tölvupóst á fi@fi.is og gefa upp nafn og kt, og nafn forráðamanns.

Halló Bolungarvík - Reykjafjörður, unglingar á ferð og flugi.  FÍ býður upp á unglingaferð í Bolgungarvík og Reykjarfjörð á Hornströndum eftir verslunarmannahelgi með Guðmundi Hallvarðssyni og Hallvarði Jóni.  

Nú hefur verið sett upp aukaferð um Jarlhettuslóðir með Ólafi Erni Haraldssyni. 8 sæti eru laus í ferðina en fyrri ferðin er fullbókuð.

Fullbókað er í allar ferðir FÍ á Laugaveginn í sumar.  Einnig er fullbókað í óeiginlegum Laugavegi og kennaferð um Laugaveginn.  Þá er fullbókað í sérstaka barna og fjölskylduferð FÍ um Laugaveginn á vegum Ferðafélags barnanna með 18 börnum og 12 fullorðnum.

Í morgunsárið lagði 30 manna hópur af stað í  FÍ ferð í Þjórsárver með tveimur fremstu vistfræðingum landsins og vísindamönnum þeim Gísla Má Gíslasyni og Þóru Ellen Þórhallsdóttur.  Þau hafa bæði stundað rannsóknir á lífríki Þjórsárvera í fjölmörg ár og eru án efa í hópi þeirra sem þekkja Þjórsárver best. Ferðin tekur sex daga og er farið yfir Þjórsá á bát, gengið á Arnarfell hið mikla og litla, farið að Múlajökli, hugað að gróðurfari og lífríkinu og gengið í Setrið.