Fréttir

Í þættinum reynum við að svara algengum spurningum eins og hverju þurfi að huga að þegar kemur að næringu á fjöllum, samsetningu máltíða, vökvastjórnun, hvað við eigum ekki að taka með okkur sem og algeng mistök sem fólk gerir varðandi næringu og máltíðir á fjöllum. Gestir okkar eru þau Anna Sigríður Ólafsdóttir, kölluð Anna Sigga, Prófessor í næringafræði við Háskóla Íslands. Auður Elva Kjartansdóttir, sérfræðingur í ofanflóðum með mikla reynslu leiðsögumaður og af störfum í björgunarsveit. Auður hefur einnig gengið oftast kvenna á Hvannadalshnúk eða um 80 sinnum. John Snorri Sigurjónsson er einnig gestur okkar en hann er fyrsti og eini íslendingurinn sem hefur gengið á K2, en K2 er eitt hættulegasta fjall í heimi. John náði þeim stórkostlega árangri að fara á þrjú fjöll sem eru yfir 8.000 há á aðeins 80 dögum.

Skráning er hafin á 11. Umhverfisþing sem haldið verður föstudaginn 9. nóvember 2018 á Grand Hótel í Reykjavík. Að þessu sinni verður grunnstef þingsins ný hugsun í náttúruvernd og þau tækifæri sem geta falist í friðlýsingum svæða. Á þinginu verður áhersla lögð á nýja nálgun í náttúruverndarmálum. Meðal annars verður kynnt ný rannsókn á efnahagslegum áhrifum friðlýstra svæða, rædd verða tengsl náttúruverndar og byggðaþróunar og áform um stofnun þjóðgarðs á miðhálendi Íslands skoðuð frá ólíkum sjónarhornum. Þinginu lýkur svo með pallborðsumræðum um sama efni.

FÍ Svalur á fjöllum boðar til haustgöngu í Heiðmörk laugardaginn 13. október kl. 11:00. Létt og þægileg ganga í Heiðmörk, u.þ.b. 2 tímar. Upplifum haustið saman í bland við allskonar skemmtilegan fróðleik. Mæting kl: 11.00 í Mörkina þar sem sameinast er í bíla fyrir þá sem vilja annars hefst gangan kl:11.30 frá bílastæðinu við Vífilsstaðavatn.

Ratleikurinn í Heiðmörk hefur staðið allan ársins hring frá árinu 2012. Við bjóðum öllum þeim sem vilja hjálpa okkur að taka til hendinni n.k. laugardag frá kl. 13:00. Nú þarf að reka niður staura, bora, lakka og dytta að ýmsu í fögru umhverfi.

Síðustu lýðheilsugöngurnar fara fram miðvikudaginn 26. september kl. 18:00 um land allt. Þeim hefur verið býsna vel tekið og eru göngugarparnir taldir í þúsundum. Á þessum síðasta göngudegi verður m.a. boðið upp á göngu um Bessastaði og Skansinn í Garðabæ, gljúfrið við Giljá á vegum Blönduóssbæjar, gengið verður frá Skjálftasetrinu á Kópaskeri, farið um gömlu Eyjafjarðarbrýrnar að austanverðu og gengið upp gömlu Kambana.

Það var Ferðafélagi barnanna mikill heiður að afhenda stórum hópi duglegra og kátra barna viðurkenningarskjal sem Fjallagarpar Ferðafélags barnanna að aflokinni Esjugöngu um helgina. Það hefur verið ótrúlega gaman að ganga með þessum brosmildu og kátu krökkum á sex fjöll og við hlökkum til að hitta þau og aðra krakka aftur í vor þegar við höldum verkefninu áfram!

Námskeiðið Vettvangshjálp í óbyggðum / Wilderness First Responder (WFR) er 76 klst. sérhæft námskeið í vettvangshjálp, ætlað þeim sem starfa fjarri almennri bráðaþjónustu og gætu verið í þeirri aðstöðu að bera ábyrgð á hópi eða sjúklingi. Af þeim sökum hentar námskeiðið til dæmis vel þeim sem eru leiðsögumenn í óbyggðum.

Ferðafélag Íslands og Rauði krossinn bjóða upp á fjórar göngur í október, í og við Reykjavík þar sem nýir Íslendingar eru boðnir velkomnir.

Það styttist í vetraraðstæður á hálendinu og verið er að vinna að lokunum skála á Laugaveginum. Langidalur í Þórsmörk verður opinn til 1. október en opið verður áfram í Landmannalaugum.

Tólf manna vinnu­hóp­ur á veg­um Ferðafé­lags Íslands fór í vinnu- og frá­gangs­ferð í Hrafntinnu­sker um helg­ina. Farið var með efni og aðföng á fimm jepp­um og tveim­ur vöru­bíl­um með krana. Einnig voru grafa og haugsuga með í för. Mun fleiri komu að und­ir­bún­ingi ferðar­inn­ar með margs kon­ar efn­isút­veg­un og snún­ing­um.