Fréttir

Nú hallar sumri og haustjafndægur nálgast. Ferðafélag Íslands býst í vetrarbúning og eru skálaverðir farnir úr skálum á Laugaveginum nema Landmannalaugum og Þórsmörk. Ferðalangar sem stefna á fjöll þurfa því að halda uppi fyrirspurnum og skipuleggja ferðir sínar með tilliti til þess. Opnunartími skrifstofunnar breytist einnig og verður opið frá 12.00 til 17.00 eftirleiðis sem venja er um haust og vetur.

Frá og með 16. september opnar skrifstofa Ferðafélagsins kl 12:00

Þessi frísklegi hópur hóf átakið Esjan alla daga á þriðjudaginn og hyggjast ganga á fjallið eftir ýmsum leiðum tvisvar í viku til áramóta. Þórður Marelsson og Fríður Halldórsdóttir stjórna átakinu fyrir Ferðafélag Íslands.

Hin árlega draugaferð FÍ var fullskipuð um helgina. Þátttakendur gengu um söguslóðir á Kili og gistu svo í Hvítárnesi, elsta sæluhúsi félagsins. Þar var borðuð kjötsúpa og rifjaðar upp reimleikasögur sem fylgt hafa staðnum síðan husið var reist. Á kvöldvökunni var farið með ljóð og menn skiptust á reynslusögum af yfirnáttúrulegum atburðum. Síðan var gist í þessu gamla húsi og um nóttina bar eitt og annað fyrir sem erfitt er að skýra útfrá viðurkenndum lögmálum. Sjá myndir hér.

Átakið Esjan að hausti-alveg fram að jólum undir stjórn Þórðar Marelssonar hefst á þriðjudag 14. sept.  Mæting er við Esjustofu kl. 17.50 og lagt af stað kl. 18.00. Við upphaf fyrstu göngu fá þátttakendur dagskrá fyrir allt tímabilið með leiðavali og nákvæmum leiðbeiningum um mætingu. Enn er tækifæri til að skrá sig í þetta stórskemmtilega átak þar sem tekist verður á við Esjuna eftir afar fjölbreyttum og áhugaverðum leiðum. Smellið á meira og lesið dagskrána í heild.                                           

Þann 5. október n.k. hefst námskeið í stjörnuspeki í sal FÍ í Mörkinni 6. Námskeiðið er ætlað öllum þeim sem áhuga hafa á að tengjast náttúrunni í gegnum þessa fornu speki og læra um grunnþætti stjörnuspekinnar í máli, myndum og göngu. Flestir þekkja eflaust stjörnumerkið sitt þótt kannski færri viti umfang þessarar aldar gömlu speki sem á sér afar sterkar rætur í náttúrunni. Námskeiðið stendur yfir í 7 vikur og kostar 15.000kr. Kennt verður á þriðjudagskvöldum frá 18:00 - 21:30. Kennari verður Bjarndís Arnardóttir (6993691) stjörnuspekingur og leiðsögumaður. Stjörnuspekin hefur haft djúp og varanleg áhrif á mannkynssöguna því trúin á að stjörnurnar hafi áhrif á líf okkar hefur lifað í aldaraðir enda órjúfanlegur hluti af náttúrunni. Upphaflega voru það aðallega bændur fornþjóðanna sem studdust við hana í þeim tilgangi að hámarka uppskeruna. Þeir voru knúnir áfram til þess að finna leiðir um heppilegasta sáningatímann og komust að því að himintunglin voru þeim gagnleg í þeim efnum.

,,Esjan að hausti - alveg fram að jólum,"  er verkefni sem hefst um miðjan september hjá FÍ ef næg þátttaka fæst. Þá verður boðið upp á tvær fjallgöngur í viku á Esjuna, eina í miðri viku og eina um helgar.  Segja má að Esjan verði gengin þvers og kruss og leiðaval verður fjölbreytt.  Fararstjóri í öllum Ejsugöngunum er hinn síungi og fjallhressi Þórður Ingi Marelsson fyrrverandi markaskorari hjá knattspyrnufélaginu Vikingi.  Verkefnið er ekki síst hugsað sem frábær líkamsrækt og góður félagsskapur í glaðværum og jákvæðum hópi fjallamanna.  Sérstakur undirbúningsfundur verður haldinn þriðjudaginn 7. september kl. 19 í sal FÍ Mörkinni 6.  Þátttökugjald í verkefnið er kr. 15.000/18.000

Árgjald FÍ 2010 er kr. 5.800.  Innifalið í árgjaldinu er m.a. árbók félagsins sem send er heim til félagsmanna eftir að þeir hafa greitt árgjaldið.  Auk þess fylgir ársskírteini félagsins sem veitir betri kjör í skálum og ferðum félagsins sem og afstlátt í fjölda útivistarverslana og þjónustufyrirtækja í Reykjavík og víðar.  Greiðsluseðill fyrir árgjaldinu var sendur út til félagsmanna í lok júní og þegar hafa á fimmta þúsund félagsmenn greitt árgjaldið og fengið árbókina senda heim.  Félagsmenn sem verið hafa í sumarleyfi og á ferð og flugi eru minntir á að greiða árgjaldið og fá þá bókina senda heim.

GPS Staðsetningartæki og rötun Mæting á námskeiðið sem hefst mánudaginn 13. september er kl. 19:30 í st. 206 á 2. hæð Tækniskólans við Háteigsveg (áður Sjómannaskólinn). Almennt námskeið fyrir byrjendur og þá sem vilja upprifjun í notkun á staðsetningartækjum. Farið er yfir notkun á staðsetningartækjum og þátttakendur æfa sig í að finna punkta og setja inn í tækin og merkja út á korti. Þátttakendur hafa með sér eigin GPS tæki, áttavita og skriffæri. Námskeiðið er tvö kvöld inni og svo ein útiæfing. Kennari: Sigurður Jónsson björgunarsveitarmaður og leiðbeinandi í rötun og ferðamennsku. Tími:   13. og 15. september 2010 frá 19:30 - 22:30 og 18. september er útiæfing sem tekur um 2 tíma. Verð: 14.000 kr. Félagar í Ferðafélagi Íslands fá 10% afslátt af námskeiðsgjaldinu.

Brynjudalur er afar fallegur og gróðursæll, umgyrtur háum fjöllum á báða vegu. Norðan dals heitir Múlafjall en sunnan Bolafell og Suðurfjall og Þrándarstaðafjall vestast. Brynjudalur státar af  ótal giljum, flúðum og fossum sem vert er að gefa gaum. Eftir dalnum miðjum rennur Brynjudalsá sem á upptök sín í Sandvatni austan Djúpadalsborga. Innst í dalbotninum heita Þrengsli. Fyrrum var búið á fjórum bæjum í Brynjudal, Skorhaga, Þrándarstöðum, Ingunnarstöðum og  Hrísakoti. Allir eru þeir nú í eyði.