Fréttir

Fyrsta ganga verkefnisins Eitt fjall á mánuði á vegum Ferðafélags Íslands verður farin laugardaginn 29. janúar. Gengið verður á Blákoll sem er 532 m. hátt móbergsfell rétt austan við Litlu kaffistofuna  í Svínahrauni sunnan þjóðvegar.  Við austurmynni Jósepsdals eru tveir áberandi hnúkar sem nefnast Sauðdalahnúkar en Blákollur er rétt austan við þá og nær veginum.Upphafsstaður göngu er við áminningarskilti Umferðarstofu þar sem bílhræi er stillt upp á stólpa rétt fyrir ofan brekkuna austan við Litlu Kaffistofuna. Þar er hægt að aka út af veginum ofan í malarnám.Þar hefst gangan kl. 10.30. en þeir sem vilja geta hist í Mörkinni 6 við húsakynni Ferðafélagsins og sameinast í bíla. Brottför úr Mörkinni 6 er kl. 10.00. Hér er kort sem sýnir staðsetningu FÍ.Um er að ræða 300 metra hækkun og lengd göngu er um 6 km. og má gera ráð fyrir að hópurinn verði við bíla aftur um kl. 13.00. Búið ykkur vel. Reikna má með einhverri úrkomu og vindi af suðri. Fararstjórar verða: Örvar Aðalsteinsson, Ævar Aðalsteinsson, Ólafía Aðalsteinsdóttir, Einar Ragnar Sigurðsson og Jóhanna Haraldsdóttir.Hér má sjá kort af gönguleiðinni á Blákoll.                                     GSM símar fararstjóra: Örvar Aðalsteinsson 899-3109Ævar Aðalsteinsson 696-5531Ólafía Aðalsteinsdóttir 862-2863Einar Ragnar Sigurðsson 899-8803Jóhanna Haraldsdóttir 864-4719

Reglulega gefur Ferðafélagið út fréttabréf. Bréfin eru flest rafræn en einnig er á hverju ári gefið út fréttabréf á pappír. Þessi fréttabréf eru nú aðgengileg hér á vefnum og hægt er að skoða þau hér >>.

„Alls eru sumarleyfisferðirnar í ár 37 og þriðjungur þeirra nýjar. Því er af nógu að taka. Gaman er að benda á Draugaferð fyrir alla fjölskylduna um Kjöl í fararstjórn Kristínar Helgu Gunnarsdóttur, rithöfundar og Helga Geirharðssonar, en Kristín hefur einmitt skrifað magnaða bók um þetta svæði. Þá erum við með skemmtilega símahúsaferð um Haugsöræfi í fararstjórn Ævars Kjartanssonar, útvarpsmanns, sem rifjar upp framfarir og framsýni á Íslandi fyrir rúmri öld,“ segir Sigrún Valbergsdóttir formaður ferðanefndar FÍ, en Ferðaáætlun FÍ 2011 er nú komin út og hefur verið send út til félagsmanna.

„Ferðafélagið hefur frá upphafi verið frumkvöðull á mörgum sviðum þar sem ný félög og margvísleg ferðaþjónusta hafa komið í kjölfarið. Oft hafa myndast vináttutengsl milli fólks í ferðum okkar og síðan tekur sá hópur sig til og ferðast framvegis á eigin vegum.  Það teljum við góðan árangur sem krefst þó þess að félagið þarf stöðugt að vera lifandi, með frjóar hugmyndir og nýjungar í starfi sínu,“ segir Ólafur Örn Haraldsson forseti Ferðafélag Íslands.

Páll Guðmundsson, framkvæmdastjóri FÍ Í tilefni aldarafmælis Háskóla Íslands taka skólinn og Ferðafélag Íslands höndum saman og standa fyrir reglulegum gönguferðum á afmælisárinu. Páll Guðmundsson, framkvæmdastjóri Ferðafélags Íslands, segir félagið lengi hafa haft gott samstarf við Háskóla Íslands og að margir kennarar við skólann hafi verið fararstjórar fyrir félagið, setið í stjórn eða nefndum félagsins.  

Miðvikudagskvöldið 19. jan. n.k. verður haldið eitt af hinum sívinsælu myndakvöldum Ferðafélags Íslands. Að þessu sinni verður um bíómyndakvöld að ræða því sýndar verða tvær kvikmyndir eftir Pétur Steingrímsson kvikmyndagerðarmann og göngugarp. Fyrri myndin er tekin í göngu á Hvannadalshnúk vorið 2010 og heitir: Hæsti tindurinn heillar. Pétur tók þátt í hinni hefðbundnu hvítasunnugöngu FÍ. Hópurinn hreppti einmuna gott veður og fyrir vikið náðust myndir sem teljast mega einstæðar því varla munu dæmi um að kvikmyndagerðarmenn hafi áður borið tækjabúnað sinn upp á hæsta fjall landsins. Inn í myndina er fléttað sögu fjallganga á Öræfajökli og myndin sýnir mannlíf og stemmningu í hinum vinsælu Hvannadalshnúksgöngum.Seinni myndin er tekin í gönguferð hóps úr Garðabæ eftir Jökulsárgljúfrum sumarið 2004. Það eru það fossandi vötn, brumandi skógar og fagur gróður sem fanga augu myndavélarinnar ólíkt ís og hjarni Hvannadalshnúks.Af þessu tilefni verður ekki boðið upp á hefðbundnar kaffiveitingar í hléi á myndakvöldinu heldur verður poppkorn og kók eins og títt er í kvikmyndahúsum.Aðgangseyrir er kr. 1.000.

Mikill áhugi er á verkefni FÍ eitt fjall á viku en tæplega 160 göngugarpar gengu á Mosfell í morgun undir leiðsögn verkefnisstjórnans Páls Ásgeirs auk fleirii fararstjóra FÍ.  Ferðafélagið býður einnig upp á gönguverkefnið eitt fjall á mánuði og hafa þegar um 100 manns skráð sig í vekefnið og þá er boðið upp á framhaldsverkefni fyrir þátttakendur í 52 fjöllum 2010 og þar hafa um 50 þátttakendur skráð sig.  Fjallabakterían er greinilega bráðsmitandi og besta meðferðin við henni er án efa góð fjallganga, reglulega.

Fjölmenni var á fundi um gönguleiðir að Fjallabaki, samstarf og framtíðarsýn, sem haldinn var að Brúarlundi í Landsveit í dag. Mikill áhugi áhugi var meðal fundarmanna á frekara samstarfi hagsmunaaðila sem og margar áhugaverðar hugmyndir um framtíðarsýn á svæðinu.  Ólafur Örn Haraldsson forseti FÍ og Páll Guðmundsson framkvæmdastjóri FÍ voru á meðal þeirra fluttu framsögu á fundinum.

Fundur um gönguleiðir að fjallabaki  verður haldinn að Brúarlundi í Landsveit laugardaginn 15. janúar nk. frá kl. 14:00 – 16:30.Á fundinum verða nokkur framsöguerindi um gönguleiðir að fjallabaki.  M.a. verður fjallað um þau verkefni sem unnið hefur verið að  og kynntar hugmyndir að áframhaldandi uppbyggingu gönguleiða á svæðinu.  Einnig verða ræddar hugmyndir um frekara samstarf við kortlagningu og merkingar á hálendinu.Meðal framsögumanna er Páll Guðmundsson framkvæmdastjóri Ferðafélags Íslands og mun hann kynna hvernig Norðmenn hafa staðið að gönguleiðauppbyggingu, en þeir eru mjög framarlega á því sviði.Vonast er til að fulltrúar ferðaþjónustufyrirtækja, sveitarfélags og áhugafólk um gönguleiðir að fjallabaki mæti og taki þátt í umræðum um málefnið.

120 manns tóku þátt í fyrstu göngunni í verkefni Ferðafélags Íslands; Eitt fjall á viku sem hófst í dag með göngu á Úlfarsfellið. Fimm fararstjórar fylgdu hópnum, leiddu för, fræddu göngumenn um örnefni og náttúrufar og stjórnuðu teygjuæfingum þegar göngu lauk.Páll Ásgeir Ásgeirsson verkefnisstjóri sagði heimasíðuritara að hópurinn hefði verið kátur og tindilfættur. Hann sagðist vera bjartsýnn og hlakka til þess að leiða hópinn gegnum árið.Næsta ganga verður eftir viku og verður þá gengið á Mosfell í Mosfellsdal. Kannski finnst silfur Egils loksins eftir 1000 ár. Tími kraftaverkanna er ekki liðinn. Hægt að fá nánari upplýsingar undir sérstökum hlekk á heimasíðunni sem merktur er: Eitt fjall á viku. Þar birtast upplýsingar og leiðbeiningar um göngu hverrar viku og þar er að finna lista yfir fjöll ársins.