Fréttir

​,,Þetta er bara gaman og það er ekki nauðsynlegt að þekkja neinn eða kunna neitt sérstakt enda eru margir í hópnum að taka sín fyrstu skref á fjöllum," segir Vilborg Arna Gissurardóttir sem ásamt Tómasz Þór Verusyni heldur utan um dagskrá Ferðafélags unga fólksins og leiðir allar göngur félagsins.

Út er komin ný gönguleiðabók, bókin 101 Austurland eftir Skúla Júlíusson. Bókin inniheldur lýsingar á gönguleiðum á 101 tind á Austurlandi ásamt kortum, upplýsingum um hækkun, göngutíma og uppgöngutíma, gps-hnit og allt annað sem göngumenn þurfa að vita áður en lagt er á tindinn.

,,Hugmyndin er sú að foreldrar og börn gangi saman og upplifi náttúruna í sameiningu. Þetta eru gæðastundir því fólk hefur tíma til þess að spjalla og kynnast hvort öðru á annan hátt en við eldhúsborðið heima," segir Brynhildur Ólafsdóttir sem hefur ásamt eiginmanni sínum Róberti Marshall leitt starfsemi Ferðafélags barnanna undanfarin ár.

Fjallgönguverkefni FÍ, Alla leið lauk í júní eftir að hópurinn hafði lagt alls 22 fjöll að fótum sér. Nýtt verkefni hefst í lok ágúst.

Gönguleiðir á Íslandi liggja víða yfir mýrlendi þar sem oft myndast djúpar og ljótar slóðir og fólk þarf að vaða drullu langt upp á ökla. Nú hefur Ferðafélag Akureyrar, FFA, hins vegar fundið nýja aðferð til að leggja göngubrýr yfir mýrar og votlendi.

Tveir fjallgönguhópar Ferðafélags Íslands, sem luku gönguverkefnum sínum nú í vor, fara af stað aftur í haust. Þetta eru hóparnir Alla leið og Fyrsta skrefið. Kynningarfundur verður haldinn eftir Verslunarmannahelgi þar sem verkefnin og dagskrá þeirra veður kynnt.

Vegna forfalla eru nokkur pláss laus í ferð Ferðafélagsins Norðurslóðar: Öxarfjörður út og suður sem farin verður dagana 11.-15. júlí.

Hús Ferðafélags Íslands í Norðurfirði nefnist Valgeirsstaðir og er gamalt íbúðarhús í góðu ástandi. Húsið stendur við botn Norðurfjarðar, rétt ofan við fallega sandfjöru. Reynir Traustason, sem er best þekktur sem blaðamaður, er skálavörður á Valgeirsstöðum.

,Það verður að varðveita víðernin á hálendinu og stofna þar þjóðgarð. Og þetta verður að gerast strax en ekki eftir 5 eða 10 ár." segir Tómas Guðbjartsson, hjarta- og lungnaskurðlæknir og stjórnarmaður í Ferðafélagi Íslands. Tómasi var boðið að flytja fyrirlestur á svokallaðri TEDx ráðstefnu sem haldin var í Reykjavík í lok maí. TED fyrirlestrarnir eru fyrir löngu búnir að hasla sér völl sem þekkingamótandi viðburðir undir slagorðinu: Ideas Worth Spreading. Leitað er til framúrskarandi einstaklinga til að flytja stutta en áhugaverða fyrirlestra um sín hjartans mál.

Ferðafélag Íslands er ekki einungis fyrir fullfríska klettaklifrara heldur er félagið líka með gönguferðir fyrir þá sem eiga erfitt um gang af einhverjum orsökum, hvort sem það er vegna líkamlegra annmarka eins og offitu eða bakverkja eða andlegra annmarka eins og þunglyndis. Félagið er nú að auka samstarf sitt við heilbrigðisyfirvöld enda hafa rannsóknir margsýnt að gönguferðir eru mjög hollar bæði fyrir líkama og sál og sumir segja þær allra meina bót.