Fréttir

Fyrsta myndakvöld vetrarins verður miðvikudaginn 14. október.  Þá  verða sýndar myndir af Vatnaleiðinni milli Hnappadals og Norðurárdals og um leið verður kynnt nýútkomið smárit FÍ um Vatnaleiðina. Það eru þeir Pálmi Bjarnason og Sigurður Kristjánsson sem annast myndasýninguna en Sigurður hefur verið helsti fararstjóri á þessari leið í áratugi og Pálmi á sæti í útgáfunefndinni. Einnig heldur Reynir Ingibjartsson höfundur leiðarlýsinga í ritinu stutt erindi. Eftir kaffihlé kemur Páll Ásgeir Ásgeirsson og sýnir nokkrar myndir úr ferð sem var kölluð Óeiginlegur Laugavegur og var farin í fyrsta sinn í sumar. Myndakvöldið hefst kl. 20 og er aðgangseyrir sem fyrr kr. 600 og er kaffi og meðlæti innifalið. Allir velkomnir. 

Hopun og framskrið jökla er áhugavert fyrirbæri sem margt útivistarfólk hefur séð með eigin augum. Á þessari vefsíðu er hægt að skoða myndbönd af framskriði Sólheimajökuls og Svínafellsjökuls. Myndskeiðin eru byggð á myndatökum á klukkustundarfresti í 2-3 ár. Á sömu síðu er að finna samskonar myndskeið af skriðjöklum í Alaska og Grænlandi. Góða skemmtun.

Laugardaginn 10.október verður Jóhannes Sturlaugsson líffræðingur hjá rannsóknarfyrirtækinu Laxfiskum.ehf með kynningu á rannsóknum sínum á stórurriðanum í Þingvallavatni.Jóhannes mun skýra rannsóknir sínar og og verða meðal annars lifandi risaurriðar til sýnis. Jóhannes hefur stundað rannsóknir á urriðanum í Öxará og Þingvallavatni undanfarin ár.Urriðinn fer að sjást í Öxará í september en þar hrygnir hann allt fram í desember. Með þeim rannsóknum hafa fengist miklar og ítarlegar upplýsingar um atferli urriðans í Þingvallavatni.

Nú er hafin undirbúningur að útgáfu Ferðaáætlunar Ferðafélags Íslands fyrir árið 2010 sem kemur út í byrjun næsta árs. Ferðaáætlun FÍ er prentuð í 70.000 eintökum og markar upphaf hvers ferðaárs hjá þúsundum Íslendinga. Áætluninni er dreift með heilu upplagi af Morgunblaðinu og heim til ríflega 8.000 félagsmanna FÍ auk þess að liggja frammi á fjölda staða um allt land. Þá er hún einnig aðgengileg hér á vefsíðu FÍ á PDF formi.

Ný styttist óðum í jólin og því rétt að minna á árbækur FÍ, smárit, sem og ferðir með Ferðafélaginu eða félagsáskrift eru tilvalin jólagjöf.   Slík jólagjöf er bæði ódýr, skemmtileg, frumleg og um leið heilsubætandi, ef hún leiðir til þess að viðkomandi fari að stunda gönguferðir og fjallgöngur sem eru styrkjandi bæði fyrir líkaman og sál.  Nánari upplýsingar á skrifstofu FÍ.

Fyrsta myndakvöld vetrarins verður miðvikudaginn 14. október.  Þá  verða sýndar myndir af Vatnaleiðinni og um leið verður nýútkomið smárit FÍ um Vatnaleiðina kynnt en þessu fimmtánda fræðsluriti FÍ er ætlað að bæta úr skorti á aðgengilegum leiðarlýsingum og kortum á Vatnaleiðinni milli Hnappadals og Norðurárdals og eins um áhugaverð göngusvæði á báðar hendur.   Myndakvöldið hefst kl. 20 og er aðgangseyrir sem fyrr kr. 600 og er kaffi og meðlæti innifalið. Allir velkomnir.  Nánar auglýst síðar.

Skálum FÍ hefur nú verið lokað fyrir veturinn nema enn er opiði í Landmannalaugum og skálaverðir þar að störfum. Aðrir skálar félagsins hafa verið læstir og þarf að nálgast lykla á skrifstofu FÍ.  Ferðamenn sem eru á ferðinni nú á haustdögum og í vetur eru vinsamlega beðnir um að ganga vel um skála félagsins og taka þannig höndum saman um að aðkoma sé ávallt sem best.  Vetrarreglur í skálum FÍ eru:

Jón Eyþórsson einn af fyrrum forsetum Ferðafélags Íslands og frumkvöðull í margvíslegu vísindastarfi á Íslandi er upphafsmaður sporðamælinga á jöklum. Hann hóf þær um 1930 og kom á fót neti sjálfboðaliða um land allt sem mældu framskrið og hopun jökla undir hans leiðsögn. Þetta starf hefur haldist til þessa dags en hefur verið í umsjá Jöklarannsóknarfélags Íslands í hartnær 60 ár en í dag fylgjast sjálfboðaliðar með um 40 jökulsporðum og heimsækir hver sitt fósturbarn einu sinni á ári. Þessa dagana er hentugur tími til þess að fást við mælingar áður en vetur sest að.

Nokkuð hefur borið á svokölluðum sundmannakláða meðal baðgesta í Landmannalaugum seinnihluta sumars og í haust. Sundmannakláði eru kláðabólur sem sundlirfur fuglasníkjudýra valda eftir að hafa smogið gegnum húð manna. Bólurnar geta valdið talsverðum kláða og myndað litlar blöðrur. Ekki er vitað til þess að þessi sníkjudýr valdi mönnum skaða en þau geta lifað í líkama spendýra í daga eða vikur. Mest ber á þessum sníkjudýrum seinnihluta sumars og fram eftir september en eftir það dregur úr áreiti þeirra. Rétt er því að ferðalangar sem hyggja á baðferðir í Landmannalaugum viti af þessu og fari í lækinn á eigin ábyrgð.

N.k. laugardag verður farin árleg haustganga Hornstrandafara Ferðafélags Íslands. Þetta eru gönguferðir með árshátíðarívafi og að þessu sinni verður gengið umhverfis Hrómundartind á Ölkelduhálsi. Þar er fjölbreytt landslag með hverasvæðum og mun án efa koma mörgum á óvart. Þaðan liggur leiðin í Sundlaug Selfoss og loknu þrifabaði halda ferðalangar hreinir og stroknir í Básinn í Ölfusi þar sem verða fjölbreytt hátíðahöld fram eftir kvöldi en á eftir stiginn dans við undirleik Breiðbandsins. Veðurspá helgarinnar gerir ráð fyrir hægri norðanátt sem er hagstæð og í dag 29. sept. rennur út frestur til að tilkynna þátttöku á skrifstofu Ferðafélags Íslands. Látið ekki happ úr hendi sleppa.