Fréttir

19. september var þess minnst að 30 ár voru liðin frá fyrstu skipulögðu göngu Ferðafélags Íslands um Laugaveginn milli Landmannalauga og Þórsmerkur. Afmælisgangan fór þannig fram að ekið var frá Reykjavík að morgni laugardags inn á Emstrur og gengið frá Emstruskála niður í Langadal í Þórsmörk. Þessi leið er síðasta dagleið hins hefðbundna Laugavegar. Farþegar í afmælisferðinni hrepptu sérlega fallegt veður og Kristján M. Baldursson fararstjóri sagði í samtali við heimasíðu FÍ að fegurð fjalla og jökla og logandi haustlitir hefðu heillað alla sem sáu.

Tindfjallaskáli er kominn á sinn stað á ný efst í Tindfjöllum eftir snöfurlega endurbyggingu sem fór fram síðastliðið ár á plani við Kirkjusand í Reykjavík. Skálinn á sér merka og langa sögu en félagið Fjallamenn sem upphaflega reisti hann var stofnað 1939, fyrir réttum 70 árum. Skálinn hefur verið í umsjá Íslenska alpaklúbbsins frá 1979 eða í rétt 30 ár. Því fer vel á því á þessi tímamót skuli marka glæsilega endurbyggingu skálans.

Þessa dagana er verið að loka skálum Ferðafélags Íslands í Hrafntinnuskeri, Álftavatni, Hvanngili og Emstrum. Þessir skálar hafa verið þéttsetnir glöðum ferðalöngum frá því snemma í vor enda áfangastaðir á hinum sívinsæla Laugavegi. Þeir ferðalangar sem hyggjast eiga víst húsaskjól í þessum skálum verða því að hafa samband við skrifstofu FÍ í Mörkinni 6 og fá þar lykla að skálunum. Skrifstofan er komin á vetrartíma og opnar því ekki fyrr en kl. 12.00 og síminn þar er 568-2533. Áfram verður opið um sinn í Langadal í Þórsmörk og í Landmannalaugum og þar verða skálaverðir.

Ferðafélag Fljótsdalshéraðs fagnar 40 ára afmæli sínu laugardaginn 19. september n.k. Þessara tímamóta verður minnst með vígslu nýs skála í Loðmundarfirði. Vígslan sem jafnframt er afmælisveisla hefst kl. 14.00. Ferðafélag Íslands óskar félaginu innilega til hamingju með áfangann en fulltrúar FÍ munu sækja afmælisbarnið heim á þessum merku tímamótum.

Frá og með 15. september opnar skrifstofa Ferðafélagsins kl 12 og er opin til kl. 17.

Nú hefur verið dregið í Esjuhappdrætti FÍ og Visa.  Alls um 22.000 þátttakendur skráðu nöfn sín og netfang í gestabækurnar og hafa verið dregnir út 8 vinningshafar en 2 verða dregnir út úr gestabók á Þverfellshorni sem enn er í póstkassanum.  Nöfn vinningshafa eru:  Íris Fjóla Bjarnadóttir, Elva Dís Hlynsdóttir, Andrea Guðjónsdóttir, Kjartan Benediksson, Einar Njálsson, Óskar Ólafsson, Jóhannes Jónsson og Harpa Sveinsdóttir,  Vinningshöfum hefur verið sendur tölvupóstur og þeir boðaðir á skrifstofu Ferðafélagsins.

Ferðafélag Íslands hefur nú safnað saman öllum gestabókum i Esjuhappdrætti FÍ og VÍSA í sumar.  Metþátttaka hefur verið í gönguferðum i Esjunnni í sumar en um 22.000 manns hafa skráð nöfn sín í gestabækur Ferðafélagsins á Þverfellshorni og við Steininn og samkvæmt tölum FÍ er það um 90% aukning frá fyrra ári þegar um 12.000 manns skráðu nafn sitt í gestabækurnar.

Ferðalangur á göngubrúnni yfir Krossá. Mikill vöxtur hefur verið í vötnum í Þórsmörk og á Þórsmerkurleið undanfarna viku. Krossá og Steinholtsá hafa á köflum verið ófærar og Hvanná mjög grafin og straumhörð og ill viðureignar. Elva Dögg skálavörður í Langadal sagði í samtali við heimasíðu FÍ að árnar væru þokkalega færar stórum bílum eins og sakir standa.

Hin árlega haustganga Hornstrandafara FÍ verður farin laugardaginn 3. október nk.

Ferðafélag Íslands og Olís gerðu með sér samstarfssamning í sumar. Í tengslum við hann var gert samkomulag um hópakort sem félagsmenn FÍ geta sótt um hjá Olís. Hópakortið er afsláttarkort sem veitir félagsmönnum FÍ afslátt af eldsneyti og öðrum vörum á þjónustustöðvum Olís og Ellingsen. Nöfn þeirra sem sóttu um hópakort fyrir 15. ágúst sl. voru sett í pott sem dregið var úr og eru það Hjördís Hjartardóttir og Viðar Hafsteinn Eiríksson sem voru svo heppin að vera dregin út og hreppa þau hvort um sig 15 þúsund króna gjafabréf í Ellingsen. Þau hafa þegar vitjað vinningsins og óskum við þeim til hamingju og vonum við að þau njóti vel. Jafnframt þökkum við öllum félagsmönnum Ferðarfélags Íslands fyrir þátttökuna. Þeir félagsmenn sem ekki hafa sótt um ennþá geta gert það núna með því að smella hér