Fréttir

Ferðafélag Íslands stendur fyrir gönguferðum fyrir bakveika í apríl – júní. Léttar gönguferðir með styrkjandi stöðuæfingum 3 í viku auk heimaverkefna og þegar liður á verkefnið verður farið í léttar fjallgöngur. Sérstakur kynningarfundur fyrir bakskóla FÍ verður haldinn þriðjudaginn 26. mars kl. 20 í sal FÍ Mörkinni.

Ferðafélag Íslands er með skálavörð í Landmannalaugum nú yfir vetrarmánuðina og fram yfir páska. Frímann Ingvarsson hefur staðið vaktina í Laugum í vetur og er ánægður með dvöl sína á staðnum.

Ferðafélag Íslands verður með skálavörð í Langadal í Þórsmörk um páskana og stendur fyrir fjölskylduferð í Langadal. Tilvalið fyrir alla ferðafélaga að njóta náttúrufegurðar í Þórsmörk yfir páskana og eiga góða stund með fjölskyldunni á þessum einstaka stað

Á dögunum undirrituðu Páll Guðmundsson framkvæmdastjóri FÍ  og Gísli Már Gíslason prófessor við HÍ undir ritsamning þess efnis að Gísli Már skrifar árbók Ferðafélags Íslands 2016 um Rauðasandshrepp hinn forna og Eyrar.  Einnig var undirritaður samningur milli FÍ og Hjörleifs Guttormssonar náttúrufræðings þess efnis að Hjörleifur skrifi árbók FÍ 2018 um Upphérað og öræfin suður af.

Útgáfutónleikar og söngvakvöld í Hannesarholti.  Fimmtudagskvöld 21. mars, kl. 20 verður fjölbreytt söngvaka í salnum í Hannesarholti á Grundarstíg 10. Þar flytur hópur söngfólks og tónlistarmanna söngva í tilefni af útgáfu albúmsins Kúnstir náttúrunnar (CD- og DVD-diskur).     Útgáfan er helguð aldarafmæli Sigurðar Þórarinssonar sem var á síðastliðnu ári. Útgefendur albúmsins standa að dagskránni ásamt menningarmiðstöðinni Hannesarholti. –   Aðgangseyrir er kr. 2.000  –  Aðgöngumiða þarf að panta á netfanginu songvaka@gmail.com. Staðfesting á pöntun berst síðan í tölvupósti. Athugið að salurinn rúmar aðeins liðlega 60 manns og því mikilvægt að panta tímanlega.  Miðar eru síðan greiddir við innganginn rétt fyrir tónleikana.     Meginuppistaðan í dagskránni verður þessi:   1) Hópurinn flytur söngvísur við ljóðaþýðingar og frumsamda texta Sigurðar. Gerð verður stuttlega grein fyrir útgáfunni og tilurð söngvísnanna.      2) ’Edda Þórarinsdóttir og tríóið Pálsson’ flytja nokkra söngva, þar á meðal einn sem er á fyrrnefndum hljómdiski.   3) Flutt verða þekkt sönglög við ljóð Hannesar Hafstein. Hér er vel þegið að gestir kvöldsins taki undir.   Flytjendur verða:  Árni Björnsson, Björgvin Gíslason, Edda Þórarinsdóttir, Elín Ýrr Agnarsdóttir, Gunnar Guttormsson, Halldór Ólafsson, Kristján Hrannar Pálsson, Magnús Pálsson, Njáll Sigurðsson,  Oddur Sigurðsson, Páll Einarsson,  Reynir Jónasson og Rúnar Einarsson.   Í hléi geta tónleikagestir fengið sér kaffi eða te.  Einnig gefst þá kostur á að kaupa albúmið.

Aðalfundur Ferðafélags Íslands verður haldinn fimmtudaginn 21. mars nk í sal FÍ Mörkinni 6 og hefst kl. 20. Hefðbundin aðalfundarstörf.

Þriðja ganga verkefnisins Eitt fjall á mánuði 2013 á vegum Ferðafélags Íslands verður farin laugardaginn 16 mars.

Samstarf FÍ og HÍ ,,með fróðleik í fararnesti, " hefst í næsta mánuði.  Þá verða farnar spennandi ferðir meðal annars fuglaskoðunarferð í Grafarvog og Kræklingaferð Í Hvalfjörð.

Þetta líflega myndband var tekið í göngu 52 fjalla hópsins á Stóra-Meitil laugardag 2. mars s.l. Starf 52 fjalla hópsins hefur gengið sérlega vel það sem af er vetrar þar sem harðduglegur hópur sækir verkefnið af miklum krafti.Daginn sem farið var á Stóra-Meitil var veður allgott, bjart og svalt veður og þokkalegt skyggni yfir nágrennið þar sem göngumenn gátu borið kennsl á ýmis fjöll sem þegar hafa verið lögð að velli og ekki síður fjöll sem bíða göngu á næstu vikum.Til þess að leggja inn á söfnunarreikning hæðarmetra var ákveðið á bakaleið að ganga einnig á Litla-Meitil. Það reyndist vera skemmtileg gönguleið og varð gönguferð laugardagsins því 10.5 km að lengd og uppsöfnuð hækkun nálægt 500 metrum.Á leið inn með Meitlum að austan var að sjálfsögðu staldrað við skógarreitinn fallega sem Einar heitinn Ólafsson gróðursetti og hlúði að en Einar var mikill Ferðafélagsmaður og lagði mikið af mörkum til uppbyggingar félagsins.Í þessari göngu voru rúmlega 80 þátttakendur. Það var Páll Ásgeir Ásgeirsson stjórnandi verkefnisins sem tók myndir og setti saman myndbandið.

Aðalfundur Ferðafélagsins Norðurslóðar verður haldinn í skólahúsinu á Kópaskeri laugardaginn 2. mars n.k. Fyrir fundinn, eða kl. 15:00 verður farið í stutta göngu frá skólahúsinu meðfram ströndinni við Kópasker, og síðan hefst fundurinn kl. 16:00.   Á dagskrá eru venjuleg aðalfundarstörf, svo sem skýrsla stjórnar og reikningar, inntaka nýrra félaga, kosningar og önnur mál. Þá verða sýndar nokkrar myndir úr göngum síðasta árs og ferðaáætlun Norðurslóðar 2013 verður kynnt.  Gaman væri ef fólk hefðu með sér myndir úr gönguferðum félagsins.Eftir fundinn fá fundargestir leiðsögn um Skjálftasetrið.Fundurinn er öllum opinn. Fólki er velkomið að koma og kynna sér félagið.Ferðafélagið Norðurslóð var stofnað 21. apríl 2009. Félagssvæðið er úr Kelduhverfi í vestri að Bakkafirði í austri. Félagið vill stuðla að ferðalögum um starfssvæði sitt og greiða fyrir þeim. Félagið er sjálfstæð deild í Ferðafélagi Íslands, sem þýðir að félagsmenn njóta allra sömu réttinda og félagar FÍ. Félagsmenn FÍ njóta umtalsverðra fríðinda. Má þar nefna Árbók félagsins sem er innifalin í árgjaldi. Afslátt í ferðir félagsins, afslátt í gistingu í skála félagsins sem og í skála ferðafélaga á norðurlöndum, afslátt í fjölda verslana og fróðlegar upplýsingar um ferðalög.